Luke 18

O'mosola Abusote Elamivo Lovo' Lovo' Ogo Mineloningumu' Izesu' Aneza Gamazi Line'

1Ido' gamene ma nene Izesu' aza gosele' ngebelamivo gamene gamene O'mosola laakovo' igi mini hulami minilizave lo aneza gamazi ne'mino ma lo-ngimine': 2Numuno ebe' naba mau' zasi ma minine' ne'mo nene aza O'mosomu' golise gelamaa' ido' evenekumu' nene do haza nite' lolo' o-ngedosa gelaa' ine'. 3Ido' a'mingu' nene gevono' ma minine' ne'mo nene gamene gamene a'mine zasi neida ogo ti' lo lovo' lovo' ogo minine': Ve masi goni' olosa nosize. A'mingu' nene neni' gamazi'ne hize ele' ogo do lisihe' o-nedezo. 4Ne'mine loka' loka' ogo neivo a'mine zasi ne'mo gele hulosa ngomo ma minine'za alinge' nene ei' lulouko gala ti' lo gelo line': O'mosomu' golise gelamaa' ido' evenekumu' ningo do haza nite' lolo' o-ngedaa' nouve nouvoni'za 5gevono' me'mo nene lihiteheka lo neine' nenako nemu' nene aza oka' oka' ogo ne do gosele' gehepeve o-nedalive lo eze gamazi've hize ele' ogo do lisihe' o-delove line'. 6Ne'mine lo Guvelesi ve imine' molo ti' lo line': Monovolo goloso o vine' zasi ne'mo line' gamazi nene mo gilikeve. 7Ido' O'moso ne'mo a'mine zasi nene ivile' ogo eze do kegesine' evenele zuho go' laneme go' laneme ezela laa' nave nene hize ele' o-ngedamilihe. Ezela likevo hize ele' o-ngedamo gamene ha'na ha minelihe. O've. 8Naza lo-lengemelove. Aza lite' lo hize ele' o-ngedeleseive. Ne'mine oloseine'za O'mosolati' ve gihile aloni' gameneu' nene O'mosomu' gili ele'vole' avemu' nene vise' ogo vai' ningelohe. O've. Mo vai' ningamolosuve.

Oko'ine Di Dizaa' Ave Nene O'moso'mo Do'mo Leme-ngedeleseive Lo Halisaio' Ve Malokisi Ido' Takisi Moni Daa' Ive Malokisi Lo Molo Izesu' Aneza Gamazi Line'

9Izesu' aza aneza gamazi gohi ma imine' molo line' nene evene' malite engikumu' gilavo evene' lisihe' lamine' dizi minisa evene' linge mamu' nene gilavo leme minaa' ingumu' nene ti' lo lo-ngimine': 10Halisaio' mono' laa' ive mali'mo O'mosola lolosa mono' numuno nabau' dize minine'. Neivo ve gohi ma evene' gono goloso takisi moni daa' ive azasi nene O'mosola lolosa a'mine mono' numuno nabau' nene dizo minine'. 11Halisaio' ve aza nene ote mino O'mosola lulouko ti' lo line': O'mosoo, evene' linge muki' ingine evene' go'ine izi inite' gumine gidini daa' ave nizahe vene' longo' iga' ave nizahe monovo lisiheto' e'metamaa' ave nizahe naza engi' nevo'mine ve ne'mine minamo takisi moni daa' ive mene'minesi minamuvoni' nemu' nene mo lamine' ve lo gopo'ni noluve. 12Naza nene salele hamo' hamoku' gamene sita' sita' monokumu' ve lo noso' nite' malise ogo minaa' nouve. Ido' inite' mata'ne teni teni daa' nouvonguti' hamo' hamo' nene gei' gemaa' nouve line'. 13Halisaio' ve aza ne'mine line'za takisi moni daa' ive nene hota gidini ote mino vokene' igi okulumokuko vonu' igi O'mosola laa' ani' ne'minesi amo asi eita lihime monovomu' agae lo gelo losonolo' pou' pou' lo belo ti' lo line': O'mosoo, lihimelo' ve nouvoni' nenaze. Mulumo'ne ningo ise'ne izezo line' ve. 14Nemu' nene naza ti' lo nolo-lingimuve. Ingine oko'ine di dizaa' nave nene O'moso'mo do'mo leme-ngedo oko'ine di limaa' nave nene do'mo dize-ngedaa' neine' nenako Halisaio' ve nene O'moso'mo lihime've hulo-do do lisihe' o-divosa vivoba asi takisi moni daa' ive nene O'moso'mo lihime've hulo do lisihe' o-divosa numu'vela vine' ve.

Izipe nGomo nGomo Izesu' No'noho' Ize-ngidine' Gamazi

(Mataio' 19:13-15; Maleko' 10:13-16)

15Neloti' nene evene' ingine izipe ngomo ngomo nene Izesu' oko'nido' do gelo no'noho' ize-ngedelive li ngele'mizi di Izesu' neida ani'za Izesu' izipahala zuho ingine ningi evene' nene ngelemi o've li-ngidani'. 16Ne'mine ani'za Izesu' aza izipe nene ngele'mizi alizave lo vise nolo-ngedo ti' lo line': Izipe ngomo ngomo me'mine minave nene O'moso'mo gizebo o neingu' ngele'mize molaa' neinako huli-ngimikavo nenita ha alizaze. O've li-ngidamilo. 17Naza lamineto' nolo-lingimuve. Izipe ngomoliti ngemeni dameni ne'minesi mini O'moso nene gizebo vete minelive li gelekele' lapa nomine' i-damilizave nene ei' O'moso'mo gizebo o neingu' nene mo keke' vi hilamilisave.

Izesu' Heneni Vemu' Line' Gamazi

(Mataio' 19:16-30; Maleko' 10:17-31)

18Ido' evene' naba dizo minive mali'mo Izesu'ni ti' lo longo' o-dine': Tisa' lamino, naza nene nadi' okuvo O'moso'mo minevo' minevo' nemeni dameni nemelive. 19Ne'mine lavo Izesu' ti' lo lo-imine': Nezemu' nene ve lamino nanimu' nolo-nedane. Lamine' minave nene hamokisi mo nizamavo O'moso ei' hamo' nene lamine' minive nenako ne'mine laine' nene neni' monovo'ne nadi' o neive. 20Gaza aka gamazi nene mo gele nane'. A'mine gamazi nene ti' lo neive: Lingine vene' vemoho' lili' ikeni' nete bizivo' mini vene' nehe vemoho' nehe gohi masi gopo ingamilo. Ido' lingine evene' ngibili hilamilo. Ido' gumine amilo. Ido' evene' mamu' gopo' napa gamazi li-ngidi sakupo gamazi li-ngidamilo. Ido' izetingine metinginemu' gilikevo dizavo gelekele' i-ngidi minilo. 21Ne'mine lavo ve aza ti' lo lo-imine': A'mine laine' muki' nene naza izipeloti' gelo e'mete'mo ogo minuvoni' ve. 22Ne'mine lavo Izesu' aza nene gelo ve nene ti' lo lo-imine': Gaza inite' hamo' ma amanidi'mo nene olihe lisihe' gehepeve amane. Nemu' nene gaza inite' mataka vai' geita minine' nene meni dosa a'midoti' moni've nene ize' molo goho' gahali' minani' nene ngeme osu' lozo. Ne'mine iline' ne'mo nene henenika Okulumokuko nene ma mineleseive. Ido' ne'mine ogosa nene ogo neni' ne'metezo. 23Ne'mine line'za ve aza nene moni heneni ve goloso minine' nenako nemu' Izesu' line' gamazi nene aza gilivo geni belavo golo muhele' ine'.

24Ne'mine ogavo Izesu' aza vonu' bele mino ti' lo lo-ngimine': Heneni nganeni vai' goloso di minaa' nave nene O'moso'mo gizebo o neine' ebeku' nene vilisa ge'nebe goloso ilisave. 25Ido' kamela ize nene naba neine' nenako nemu' nene nala' loloso' iga' nani' nakese ne'mi veleu' nene ma volosa iline' nene ge'nebe goloso oloseine'za heneni ve nete a'mine nene ivile' ivosa O'moso'mo gizebo o neine' ebeku' nene vilisa ge'nebe goloso ilisave. 26Ne'mine lo lavo a'mine gamazi gilave nete ti' li Izesu'ni li-imani': Laza nene O'moso'mo umo hilive nene heneni ve lolo' o-ngedaa' neihe lo gilune'za gaza heneni ve netesi O'moso'mo gizebo o neine' ebeku' nene mo vi hilamilisave lainako nemu' nene O'moso'mo evene' hamokisi mo ma do lu' izamivo eze gizebo ingu' nene vo holamolobe lo nogilune. 27Ne'mine li lani'za Izesu' aza ti' lo lo-ngimine': Evene' ingine ngeli amilizani' initekisi O'moso'mo oga' neive. Nemu' nene evene' do ngu' izelido' lisihe' o neive.

28Ne'mine lavo Petolo' aza a'mido' ti' lo lo-imine': Gaza gelezo. Laza nene ebete initete muki' nene hulo osu' lo noge'metuniko a'mido' meni nani dalone. 29Ne'mine lavo Izesu' aza ti' lo lo-ngimine': Naza lamineto' nolo-lingimuve. Ve ma ingine O'moso'mi gizebou' vo holaloningumu' ve li a'minguko ne'meti alisa numu'ine ebe'ine nehe ele'ningine uvo'ningine naku'ningine zuho nehe ize'ningine me'ningine nehe izipaha'ine nehe nene huli osu' li ne'meti alizani' nene 30a'mine inite' vai' hulilizado' nene golo hizo me misubouko mini mili ilizangu' nene O'moso'mo vai' goloso imine' molo ngemavo dalisave. Ido' alinge' gamene nabala nene minevo' minevo' ngemeni dameni nene dalisave.

Izesu' Helo Galeseuti' Oteline' Gamazi Nene Gohi Lo-ngimivo Gamene Setohamo Ine'

(Mataio' 20:17-19; Maleko' 10:32-34)

31Ido' Izesu' aza izipahala zuho tuvelu nene ngele'mize abaza' ogo ti' lo lo-ngimine': Gililo. Laza nene Zelusalemi numuda dizo novune. A'mida vokunivo polohetelite O'mosolati' ve gihile nenito' soto' iline' initekumu' mono' godolou' li soto' igi gizani' malo' nene soto' o'mo vo gihile ize osu' loloseive. 32Ido' ne'mine noluvoni' nene nemu' noluve. Neni' nene Zuda ve minamani' ato' aleveti a'ningu' mili-nidikevo ingine gize zohi' i-nidi novozo suno goloso di-nidi gituho' i-nidi 33gasavasi nala' nedunu' mehe'ne izivi' ledivi' igi ido' nibili hililisave. Ne'mine ikevo helo gamene sitohamo mino gohi otelesuve. 34Ne'mine lo line'za ingine a'mine initekumu' nene ma gili guni amave. Ee, a'mine gamazi've nene hito minavo line' initeli'mi monovo nene gilamani' ve.

Vele Likive Ma Izesu' Do Lamine' O-dine' Gamazi

(Mataio' 20:29-34; Maleko' 10:46-52)

35Izesu' aza mo Zeliko numuno ebeto' nene ogo hetelelesa navo aka gahevela nene vele likive ma mino moni voku' voku' lo minine'. 36Ne'mino mino giline' nene evene' vai' goloso igi nivavo gelo nanitekumu' nahe lo longo' o-ngedavo 37ti' li li-imani': Nasalete ve Izesu' ma nene ogo novive. 38Ne'mine likevo gelo vise naba lo ti' lo line': Izesuvo, guvelesi ve naba Davidi' a'vo ezelo' medelo minanive make, nenikumu' nene mulumo'ne ningevo. 39Ne'mine lavo gomu' ave nete nene legeno minelive li o've li-di elemani'za aza nene gohi amuzo molo vise naba lo gohi ti' lo line': Davidi' a'vo make, nenikumu' nene mulumo'ne ningevo. 40Ne'mine lo lavo Izesu' aza gelo vo akalo' ha ote mino a'mine vele likive nene neida ele'mizi alizave lo lo-ngidine'. Ne'mine lavo a'mine vele likive nene mo avita ogavo Izesu' ti' lo longo' o-dine': 41Gaza nene nadi' o-gedelove losa nogelane. Ne'mine lavo vele likive aza ti' lo line': Guvekasi ve, gaza ve'ne nene do lamine' oganivo gohi ningeloho. 42Ne'mine lavo Izesu' ti' lo lo-imine': Gaza nene gele ele'vole' anidi'mo lamine' ogange. Veka nene gohi ningezo. 43Ti' lo nolivo a'mido' lite' lo vele nene mo lamine' ogavo vele ningo e'meto novo O'moso opo'ni lo'mo vine'. Evene' muki' ingine a'mine nene ningi O'moso opo'ni li di naba i-dani'.